Zwěčnjene na papjerje ...
W hóstnej knize Swobodneho stata Sakskeje je so dotal 86 wosobinow z cyłeho swěta zwěčniło. Prěni zapis je wot něhdyšeho zwjazkoweho prezidenta dr. Richarda swobodneho knjeza von Weizsäckera dnja 13. februara 1991. W slědowacych lětach su so mjez druhim prezident USA Barack Obama, kralowna Elizabeth II., nižozemskaj kral Willem-Alexander a kralowna Máxima do hóstneje knihi zapisali. Najnowši zapisk je wot něhdyšeho statneho prezidenta Južneje Afriki, Frederika Willema de Klerka, w aprylu 2017.
Z podpěru Sakskeje krajneje, statneje a uniwersitneje biblioteki (SLUB) bu ćmowozelena kniha ze złotymi stronami, kotruž hewak jenož za wusahowacych hosći z witriny wozmu, nalěto 2017 digitalizowana. Na Dnju wotewrjeneje knježerstwoweje štwórće dnja 11. junija 2017 móžachu zajimcy prěni raz do digitalneje knihi pohladać, kiž je nětko tež online přistupna.
